LAOAG CITY – Napilaanen ti agsusukot a kaso ti retirado a pulis a nagpaputok ti paltog na idiay ili ti Banna.
Nabigbig daytoy a ni Rogelio Macaburas y Cristobal, agtawen ti 69, ken residente iti Bgy. Macayepyep ti nasao nga ili.
Kaso nga Alarm and Scandal (Indiscriminate firing), Malicious Mischief ken panaglabsing ti Republic Act (RA) 10591 wenno Comprehensive Firearms and Ammunition Regulation Act ti naipila kontra ken ni Macaburas.
Immun unan iti daytoy, naireport iti PNP-Banna nga adda ti nagpaputok ti paltog na iti nasao a barangay isu a nagturong da a dagus tapno agimbestigar.
Maipalagip nga inadmitir a mismo ni Macaburas nga isuna ti nagpaputok ti paltog ken insuko na a dagus ti maysa a shotgun nga adda karga na a tallo a bala.
Inlawlawag ni Macaburas a pinaputukan na ti pusa gapu ta kankanen na dagiti piyek iti balayda, ngem immabot ti metal fragment ti shotgun iti balay ti karruba da.
Kinumpirmaran ti PNP a ti lisensya ti paltog ni Macaburas ket nag-expired pay idi 2017.
