LAOAG CITY – Desidido a mangipila ti reklamo ni Mr. Reynold Villegas kontra ken ni dati a Barangay Chairman Dan Toledanes ti Barangay 2 ditoy siudad ti Laoag kalpasan ti panangkabkabilda kenkuana.
Inbatadna a nalipatannan ti nasao a pasamak idi 2024 a nangitunda ti pannaka-trauma daytoy ngem arig nagsubli amin idi nabuyana ti nag-viral a video iti social media.
Inlawlawagna a gapu iti danag ken amak a mabalin a mapasamak kenkuana iti baet ti bumarbara nga isyu ket saan a palpalubosan isuna ti amona a rummuar iti pagtrabahoanna.
Kunana a malaksid kenkuana ket adu pay dagiti nadangdangran nga empleado ti dati a Kapitan.
Inpettengna a kalikagum ti dati a Kapitan nga admitarenna a tinakawna ti kawar ti crane ken adda ti pakainaiganna iti iligal a droga banag a saanna a tinungpal.
Inpaganetgetna nga uray kasano ti kinarigat iti panagbiag ket saanna a maaramid dagiti maiyak-akusar kenkuana.
Mainaig iti daytoy, kuna ni Villegas nga iti abaga ken sakana ti dinangran ti dati a Kapitan usar ti bayog.
Innayonna a malaksid ken ni dati a Kapitan Toledanes ket desidido pay a pilaanna ti reklamo dagiti dadduma pay a nangdangran kenkuana.
Maipalagip nga insigida nga inbilin ni Mayor James Bryan Alcid ti Philippine National Police nga imbestigarenda ti viral video ni dati a Barangay Chairman Dan Toledanes ti Barangay 2 ditoy siudad ti Laoag a pakabuyaan ti maipagarup a panangkabkabilna iti dua nga empleadona.
Kabayatanna, bayat a maisursurat daytoy a damag ket manarimaan ti pannakikoordinar dagiti staff ni Sen. Raffy Tulfo ken ni Villegas maipanggep iti nasao nga insidente.
