LAOAG CITY – Inlawlawag ni Police Lt. Col. Joseph Baltazar, chief of police ti PNP-Laoag a saan a maibilang a panaglaslas ti inaramid dagiti 30 a pupils ti Shamrock Elementary School.
Segun kenni Baltazar, daytoy ket gapo ta iti sugat a sinagaba dagiti ubbing ket arig na gasgas laeng ken saan a pulso ti target dagitoy.
Kunana a sabali ti termino nga inusar ti principal ti nadakamat a pagadalan rason nga isu metten ti nagwaras.
Inbatad na a nagturong da iti nasao a pagadalan ngem saan a nangipaay ti detalye ken saan a makikooperar dagiti mangimatmaton kadakuada.
Mainaig iti daytoy, rumrumuar nga adda ti nabuya ti maysa a pupil iti social media ken inpost na iti mismo nga account na ken maipagarop a tinulad dagiti dadduma nga ubbing.
Maipalagip a naalarma ti publiko iti maipagarop a panaglaslas dagiti ubbing iti sangwanan ti Ilocos Norte College of Arts and Trade usar ti cutter, foot ruler, ken pin.
