LAOAG CITY – Napilaanen ti kaso a robbery ken carnapping ti natiliw a suspek kadagiti napasamak a panagtatakaw ditoy siudad ti Laoag a ni Dave Vincent Cardona Panganiban, agtawen ti 26, taga Cagayan ngem agdama nga agtrabtrabaho iti maysa a mall ditoy ciudad ti Laoag.
Daytoy ti inpakaammo ni Police Staff Sgt. Savior Belarmino, duty desk officer iti PNP dito siudad.
Mainaig iti daytoy, kuna na a narekomendaran daytoy ti 300,000 a pisos a piyansa para iti temporaryo a pannakawaya-waya na.
Maipalagip nga inpakaamm a mismo ni PCol. Julius Suriben, ti provincial director ditoy probinsya a nakumpiskar dagiti otoridad manipud iti suspek ti tallo a motorsiklo a pakairamanan ti NMAX, Honda Wave ken Honda TMX, kasta pay ti dua a bisikleta, gadgets, nabalor a sabatos, laptop ken dadduma pay a kagamitan.
Mainaig iti daytoy, kinumpirmaran ni Police Lt. Col. Joseph Baltazar, ti baro a mangidaulo iti Philippine National Police (PNP) ditoy ciudad nga amin dagiti napasamak a panagtatakaw a naireport iti opisina da ket maymaysa ti akin-aramid a daytoy ket ni Panganiban basar kadagiti inrebisar da a CCTV footages ken dagiti nakumpiskar da nga items iti mismo a kasera ti suspek.
Innayon na nga iti panagimbestigar da ket naamoan da nga agsurvey nga immuna ti suspek kadagiti biktimaen na ken isayangkat na ti dakes a panggep na apaman a maikkan ti gundaway.
