LAOAG CITY – Saan a ninamnama ni Dr. Aira Cassandra Suguitan Castro nga agbalin isuna a Top 1 iti kaliplippas laeng a March 2023 Physician Licensure Examination no sadinno ket nakaala ti 89%.
Segun kenni Dr. Castro, saan na a ninamnama a karaman isuna iti listaan dagiti Topnotchers nangruna iti panagbalin a Top 1.
Inbatad na a maysa kadagiti nanggutigot kenkuana nga agadal iti medisina ket gapo ta ado a miembro iti pamilya da ti addaan ti sakit no sadinno ket rumuar sumrek da iti ospital pakairamanan ni Dr. Aira ken nakita na no kasano ti panagtrabaho dagiti doctor nga isu ti maysa kadagiti nagbalin nga inspirasyon na.
Malaksid iti daytoy, kunana nga iti maysa a subject no sadinno adda ti adopt community ken nai-assign isuna iti maysa a pamilya iti Barangay Gaang iti ili ti Currimao ken nakita da ti panagsakripisyo ti maysa nga ama a cancer patient.
Nakita na pay a kasapulan dagiti residente iti nasao a lugar ti access iti healthcare.
Iti agdama ket napalaos ti ragsak ni Dr. Castro ken ti sibubukel a pamilya na ken nagyaman kadagiti amin a timmulong, namati ken simmopurta kenkuana.
Mainaig iti daytoy, nagkari ni Castro a ditoy Pilipinas ti pagtrabahoan na para iti panagserbi na kadagiti Pilipino.
Ni Dr. Castro ket ummuna a nagturpos kas Summa Cum Laude iti kurso a BS-Biology idi 2017 ken class valedictorian iti batch iti College of Medicine iti Mariano Marcos State University iti ciudad ti Batac idi 2021.
