LAOAG CITY – Naipisoken iti pagbaludan ti tricycle driver a natiliw babaen iti naiwayat a Drug Buy-Bust Operation iti Brgy. 2 ditoy siudad ti Laoag idi Disiembre 11, 2024.
Segun iti Philippine National Police ditoy siudad, nakumpirmaran a shabu ti dua a sachet a nakumpiskar manipud iti suspek nga agdagsen ti 0.8grams ken addaan ti street value a P5,440.00.
Gapu iti daytoy ket sumango ti nasao nga indibidual iti kaso a panaglabsing na iti Republic Act 9165 wenno Comprehensive Dangerous Drugs Act of 2002.
Maipalagip a naarestar ti maysa a tricycle driver babaen iti naisayangkat nga Anti-Illegal Drug Buy-Bust Operation iti bakante a lote iti likodan ti National Food Authority iti Brgy. 2 ditoy siudad ti Laoag.
Basar kadagiti otoridad ti subject ket ni Jonathan Jaramilla, adda iti umno a tawen, maysa a tricycle driver, residente iti Brgy. 7-A ditoy siudad ken maibalang a Street Level Individual.
Nakumpiskar manipud iti suspek ti 2 a heat sealed transparent plastic sachet, 2 a P1,000 bill a nausar kas buy-bust money.
