LAOAG CITY – Inbatad ni Barangay Chairman Nick Foronda iti Barangay Dipilat iti ili ti Vintar a 25 a baboy pay laeng ti naikali da ita nga aldaw kalpasan nga adda ti taraken a baboy iti nadakamat a barangay a nagpositibo ti African Swine Fever (ASF) virus.
Inlawlawag ni Foronda a 250 dagiti baboy a maikali koma idi kalman ngem gapu ta naladaw da a nangrugi ket 25 laeng dagiti naikali isut gapuna nga ituloy da intono bigat.
Inpasingked ti kapitan a naawatan met dagiti kabarangayan na nga akin-taraken kadagiti naisakripisyo a baboy no apay a kasapulan a mapapatay ken maikali dagiti nasao a dingwen.
Saan met pay a maibaga ti kapitan no mano ti maited a bayad kadagiti maseknan gapu ta kasapulan a mai-assess pay laeng dagiti naisakripisyo a baboy ken saan a karaman dagiti awan pay ti 45 nga aldaw na.
Inbaga ni Foronda nga adda pay dagiti dadduma a naalaan ti sample a taraken a baboy iti barangay da.
Kabayatanna, inpakaammo ti opisyal a ti inisyal nga imbestigasyon na, ti nagsentroan ti ASF virus ket adda ti maysa nga adda ti tianggi na nga aggatgatang kadagiti ilaklako na a frozen meat.
Innayon na a mabalin a ti panaggatgatang ti frozen meat ti maseknan ti maysa a makaigapu iti nairekord da a kaso ti ASF virus iti barangay da.
Mainaig iti daytoy, inbaga ni Foronda nga idi damo ket inpagarop da a gapu iti panagtudtudo na ti makaigapu nga agsasakit dagiti taraken a baboy iti barangay da.
