LAOAG CITY – Inbatad ni SK Federated President Faye Lao ditoy siudad ti Laoag a nakigtot iti pannakatiliw ti SK Chairman ti Brgy. 22 kalpasan a nagprobokar iti maysa a karinderya.
Segun ken ni Lao, saan na nga ekspeskataren a matiliw ni SK Chairman Tristan Jade Felipe y Cu gapu ta awan met ti problema nu sumango kadagiti session ken nagduduma a programa ti Sangguniang Kabataan.
Kuna ni Lao a nu maipanggep iti akem daytoy ken awan ti makwestyunaran na gapu ta aktibo para iti nagduduma a proyekto.
Nu pay kasta, inbatad ni Lao a ti laeng ammo na a nakairamramanan ni Felipe ket ti gulo a napasamak iti napalpalabas a tawen nu sadino a nabagkong daytoy ti karinderya a nagprobokaran na.
Kabayatanna, inbatad ni Lao agkalap pay ti ad-ado a detalye sekanan iti napasamak gapua ta kasangsangpet na laeng manipod iti business trip kadua na dagiti dadduma nga opisyal ditoy siudad ti Laoag partikular ni Mayor Michael Marcos Keon.
Innayun ni Lao nga awan met ti bileg ti Sangguniang Kabataan a mangipataw ti pannusa wenno mangikkat iti pwesyo ken ni Felipe gapu ta adda ti desisyon kadagiti otoridad.
Maipalagip a natiliw ni SK Chairman Felipe gapu iti panagprobokar na iti karinderaya iti Brgy. 14 ditoy siudad ken kukua ni Brgy. kagawad Mark Anthony Pastor iti Barangay 15.
Kuna ni Police Lt. Col. Joseph Baltazar, ti chief of police ditoy siudad ti Laoag nga immuna nga adda ti nagreport iti opisina da nga agprob-probokar ti nasao nga opisyal ti barangay iti Bossing Carinderia iti Brgy. 14 ditoy siudad no sadinno a maipagarop a dinangran na pay ti barangay kagawad a mangan-anawa kenkuana.
Dagus a nagresponde dagiti otoridad iti lugar no sadinno a nadanun da ti nabartek a suspek nga agwalwala kagiddan iti panagisawang na kadagiti agkakadakes a sarita kadagiti indibidwal nga adda iti nasao a panganan.
Inpalgak ti hepe ti pulisya nga imbes nga agsardeng ti SK chairman idi adda ti presensya ti nailian a pulisya iti lugar ket isuda metten ti maipagarop nga insaruno na a dinarop no sadinno a sumagmamano kadagiti police officers ti nakugtaran.
Mainaig iti daytoy, inpalgak ni Police major Jephre Taccad, ti panakangiwat ti Ilocos Norte Police Provincial Office a sinukatan da ti mugshot ti suspek gapo ta naka-middle finger daytoy a mangipaneknek iti kinaalas ti ugali ti nasao nga SK Chairman.
Sumango ti SK chairman ti reklamo a direct assault, disobedience to a person with authority ken plano da pay a pilaan ti suspek ti administrative case ken grave misconduct.
