LAOAG CITY – Uppat a balay ken maysa a tricycle ti naminpinsan a linamot ti apoy iti napasamak nga uram iti Barangay one iti Muslim compound ditoy syudad ti Laoag.
Malaksid dayta, maysa nga ina ti nalapnos dagiti dua nga ima na gapu iti panagserrek na iti balay da a maur-uram.
Kuna na nga atapen na nga adda iti uneg iti balay da ti maysa nga anak na.
Naammuan a kaadduan dagiti akin-balay dagiti nauram ket nairana da nga awan gapu ta napan da naki-piesta idiay ili ti Piddig.
Naaramid ti light materials dagiti uppat a balay isut gapu na nga alisto a nagramram ti apoy.
Ti nauram a tricycle ket naiparking iti maysa kadagiti nauram a balay ket nairamram a nauram a naminpinsan.
Awan pulos ti nasalbar dagiti maseknan a nauraman manipud kadagiti balay da.
Kabayatan na, Kuna met ni SFO2 Rolly Domingo, iti Bureau of Fire Protection nga ituloy da ita nga aldaw ti iyuswat da nga imbestigasyon.
