LAOAG CITY – Nagatendaren iti House Blue Ribbon Committee dagiti uppat nga opisial ti Office of the Vice President (OVP) a pinatawan ti contempt ken ipaarestar gapu iti saan a panagatendar iti panagdengngeg uray namin-adu a daras dagitoy a naimbitaran.
Naammoan a dagiti uppat nga opisial ket mapapati nga adda iti inner circle ni Vice President Sara Duterte.
Karaman ditoy da Gina Acosta, Lemuel Ortonio ken dagiti agasaa a da Edward ken Sunshine Fajarda.
Immunan nga inrakurak ni Manila Rep. Joel Chua nga isu ti Chairman ti panel a nagparikna dagiti uppat nga opisial nga agatendar iti panagdengngeg iti komite.
Mamati ti komite a rumbeng nga agpalawag dagiti maseknan nga uppat nga opisial no kasano a nagastos ti 612 a milyon a pisos a confidential funds.
