LAOAG CITY – Inpakaammo ni P/Lt.Col. Jerome Wangkey, Hepe ti Batac City Police Station nga addan ti person of interest iti pannakapaltu-paltog ti maysa a babai iti Barangay San Mateo iti siudad ti Batac.
Nupay kasta, kunana a saanna pay laeng a mabalin nga ibuksilan ti dadduma a detalye tapno saan a maapektaran ti pannakaiwayat ti imbestigasion.
Inbatadna a nagtalinaed pay laeng iti ospital ti biktima para iti naan-anay a pannakatamingna.
Maipalagip a kagapgapu ti biktima a napan naglako ti nagduduma a klase ti merienda iti basketball court ken apaman nga iparadana ti naglugananna a kurong-kurong iti pagtaenganda ket adda ti nakitana a tugaw a makaabbeng iti pagdalananna isut gapuna a napanna inikkat.
Inlawlawagna a ditoy metten a kellaat a pinaltu-paltogan ti suspek ti biktima iti sumagmamano a daras iti saan pay a masinunuo a rason.
Kunana a tinamaan ti bala ti paltog iti namindua a daras iti baba a paset ti barukong ti biktima, namindua a daras iti akinkannawan a luppona ken naminsan a daras iti akinkannigid a luppona.
Naammoan a ti biktima nga agtawen ti 39, naasawaan ken residente iti nasao met laeng a barangay idinto a ti suspek ket bassit ken nakaabongot idi napasamak ti krimen.
