LAOAG CITY – Nagballaag ti US Embassy iti Manila kadagiti agaplikar iti visa a saanda mangisubmitir kadagiti peke a dokumento wenno agulbod kadagiti aplikasionda ta mabalin nga agtungpal iti pannakaarestar, kaso kontra ti criminal case, ken tungpal biag a pannakaiparit ti iseserrek iti Estados Unidos.
Iti maysa a post iti X, kinuna ti embahada a nabiit pay nga impakaammoda kadagiti pannakabagi ti Philippine law ti kaso ti panagkusit iti visa a nagresulta iti pannakaarestar ti maysa nga aplikante a nagusar kadagiti peke a dokumento.
Segun iti embahada, dagus nga ipakaammona kadagiti otoridad ti Pilipinas no maduktalan dagiti peke a dokumento ti Pilipinas bayat ti pannakaproseso dagiti aplikasion ti visa.
Impaganetgetna a nadagsen a basol ti panagkusit iti visa ken saan koma a panunoten dagiti aplikante a saan a matakuatan dagiti peke a dokumento wenno palso nga impormasionda.
