LAOAG CITY – Inbinsa-binsa ni Atty. Arnedo Valera manipud Washington D.C no anya dagiti makitkita na a kalikagom ni Russian President Vladmitir Putin iti baet dagiti addang da iti Ukraine.
Karaman ditoy ti panagkalikagom ni Putin a maisubli ti relasyon ti soviet union wenno Union of Soviet Socialist Republics, ken saan a mabalin a mawara dagiti amin a kaalyado daytoy.
Segun kenni Arnedo, saan pay a kayat ni Putin a saan a mapalawa ti NATO kageddan ti nangipetteng na a saan a rumbeng nga agbalin a miembro ti Ukraine.
Maysa pay ket ti kalikagom ni Putin a masapol nga isardeng ti panagkonsolida ti military forces kadagiti miembro ti NATO kalpasan ti 1997.
Kunana a bayat nga ilunglungalong ni Putin ti diplomatic, makita iti grounds nga agarop 80% a pwersa nga epektibo para iti maysa a military confrontation wenno military incursion iti Ukraine.
Mainaig met iti US Intelligence report, kuna ni Valera nga uray ni Ukrainian President Volodymyr Zelensky ket nagkiddaw ti kumpirmasyon no pudno ti impormasyon a rumaot ti Russia intono Miyerkules.
Naamoan a nagkiddaw pay ni Zelensky kadagiti modern nga armas ken nayun a security assistance.
Inpetteng na a daytoy ket saan laeng nga isyu iti Europe wenno iti nagbaetan ti Russia wenno Ukraine gapo ta adda met ti alyansa ken tumulong pay ti NATO iti laksid a san pay a pormal a miembro ti Ukraine.
