LAOAG CITY – Indiskribir ni United States President Joe Biden a “dangerous precedent” ti ruling ti Supreme Court ken ni dati a Presidente Donald Trump seknan iti partial immunity-na iti criminal prosecution.
Kinuna ti agdama a presidente ti Estados Unidos a ti pangngeddeng ket nangdadael iti “rule of law” ken maibilang kas “terrible disservice” kadagiti Amerikano. Nu pay kasta ket ibilang ni Trump ti desision ti korte kas dakkel a panagballigi para iti demokrasia.
Idi laeng kalman ket natakuatan dagiti hues a ti maysa a presidente ket addaan iti imunidad para kadagiti “official acts” ngem awan ti immunidadna kadagiti “unofficial acts”, no sadinno inpaima-da manen daytoy iti hues.
Gapu iti daytoy ket ad-adda a maitantan ti sentensia ti kaso a kriminal kontra ken ni Trump gapu iti maipagarup a panangpadasna a mangbaliktad iti resulta ti eleksion idi 2020 a nangitunda iti balligi ken ni Biden.
Iti agdama ket masapul a planoen a nasayaat ti trial judge no ania dagiti aramidenda iti kapasidad ni Trump kas presidente, a mabalin nga umabot daytoy iti sumagmamano a bulan.
Kabayatanna, ti trial ket rumbeng a maiwayat sakbay ti 2024 United States Presidential Election inton bulan ti Nobiembre.
