LAOAG CITY – Nagballaag ni United States President Donald Trump a mangiwayat manen ti military action ti Estados Unidos kontra iti Iran no saanda a lukatan ti Strait of Hormuz a maysa a kangrunaan a ruta iti panagangkat ti langis ken negosio iti lubong.
Inaramid ni Trump ti rakurak kalpasan nga ianunsio manen ti Iran ti posibilidad ti panagserra ti Strait of Hormuz.
Basar iti Iran, saan pay a natungpal ti Estados Unidos dagiti inkarina mainaig iti panagpasardeng ti gubat iti Lebanon isut gapuna a saanda pay laeng a makisarita maipanggep kadagiti sensitibo nga isyu kas nuclear program-da.
Iti baet daytoy, indauloan ni United States Vice President JD Vance ti pannakitaripnong kadagiti opisial ti Iran iti tulong dagiti mediator manipud iti Qatar ken Pakistan.
Inpettengna a kalikagum latta ni Trump a maaddaan ti baro a panagsinnarita iti relasion ti Estados Unidos ken dagiti umili ti Iran.
Naammoan a saan a naaddaan ti aniaman a joint appearance dagiti pannakabagi ti dua a pagilian.
Nakipagkita laeng iti saan a nabayag ni Iranian Foreign Minister Abbas Araqchi iti maysa kadagiti mediator a ni Shehbaz Sharif ngem saan a nakisarita ken ni Vance.
Inpaganetget met ti Tehran a saan a dumur-as ti negosasion pakairamanan dagiti maipapan iti nuclear program daytoy agingga a saan nga agsardeng ti rinnupak iti Lebanon ken saan a matungpal dagiti inkari a benepisio iti ekonomia ti pagilian.
