LAOAG CITY – Inawagan ni U.S. President Donald Trump ti plano ti bilyonaryo a negosyante a ni Elon Musk a mangbukel ti baro a partido nga inawagan na nga “America Party,” a “ridiculous” wenno nakakatkatawa ken mangitunda laeng ti pannakaulaw iti kada botante.
Segun ken ni Trump, umanayen ti dua a partido iti Amerika ken inpasigurado na a saan nga agballigi dagiti third party.
Ti baro a partido ni Musk ket sungbat iti baro a linteg ti administrasyon Trump a ‘tax-cut ken spending bill,’ a pinirmaan ti US Presidente iti kallabes nga isu met ti kinondenar ti negosyante gapu ta para kenkuana ket delikado iti ekonomiya ti pagilian.
Maipalagip a nangrugi ti susik dagiti dua kalpasan a napukaw ti green-energy credits para iti Tesla iti babaen ti baro a linteg ti Amerika.
Nagpangta met ni Trump a mabalin nga ibabawi dagiti kontrata ken subsidiya ti gobierno iti Tesla ken SpaceX. Innayon ni Trump a saan a rebbeng a madutukan ni Jared Isaacman, a kaalyado ni Musk, kas baro a mangidaulo iti NASA wenno National Aeronautics and Space Administration gapu iti conflict of interest.
