LAOAG CITY – Kiniddaw manen ni United States President Joe Biden ti “urgency” ti pannaka-ipatungpal ti Gaza ceasefire ken hostage release deal ken ni Israeli Prime Minister Benjamin Netanyahu.
Kadwa ni Biden ni US Vice President Kamala Harris, a nangipaganetget ti kinapateg ti panangikkat iti aniaman a lapped iti pannaka-ipatungpal ti katulagan iti Hamas.
Pinasingkedanna pay ti panagkumit ti Washington a tumulong a mangidepensa iti Israel seknan iti pangta manipud iti Iran, agraman dagiti proxy terrorist group nga Hamas, Hezbollah, ken dagiti Houthi.
Daytoy ket kalpasan nga impasimudaag ni US secretary of state iti diplomatic tour na idiay Middle East, no sadinno nga itantadudo na ti maysa a katulagan a mabalin a mangpatingga iti gubat.
Kinuna ni US Secretary of State Antony Blinken nga immanamong ti Israel iti “US bridging proposal”, kalpasan ti tallo nga oras a panagkitada ken ni Netanyahu idiay Jerusalem.
Kabayatanna, maangay ti baro a rikus ti saritaan seknan iti ceasefire idiay Cairo sakbay ti panangudo daytoy a lawas, ken manamnam a tumabuno dagiti pannakabagi ti Estads Unidos, Israel, Egyptian ken Qatar.
