LAOAG CITY – Inrakurak ni United States Secretary of State Marco Rubio a saan a makiginginnubat ti Amerika iti Venezuela, maysa nga aldaw kalpasan ti panangatake ti Estados Unidos iti Venezuela.
Segun ken ni Rubio, naikeddeng a sumango iti Korte idiay New York ita nga aldaw ti Lunes ni Venezuelan President Nicolás Maduro kaduana ti asawana a ni Cilia Flores.
Inbatad ni Defence Minister Vladimir Padrino ti Venezuela, dakkel a paset ti security team ni Maduro ken dagiti inosente a sibilian ti natay gapu iti United States operation.
Binabalaw ti Venezuela ti panangraut ti militar ken kuna ti armada a supsuportaran daytoy ti temporario a Presidente a ni Delcy Rodríguez.
Daytoy ket napateg gapu ta maysa a panangkumpirmar nga iti baet ti inrakurak ni United States President Donald Trump a ti Estados Unidos itan ti mangidaulo iti Venezuela ngem agtultuloy a mangidadaulo latta dagiti kaalyado ni Maduro.
Inpetteng ni Trump iti Atlantic a sumango iti nadagsen a pannusa ni Rodríguez no saanna nga aramiden ti husto.
Kabayatanna, inpeksa dagiti sumagmamano a Venezuelan ti panagdanagda mainaig iti peaceful transition of power.
