LAOAG CITY – Ngimmato iti P19.065 trillion ti pakabuklan ti nabatbati nga utang ti gobyerno ti Pilipinas iti panagngudo ti Hunyo ita a tawen, basar iti Bureau of the Treasury (BTr).
Nangatngato daytoy ti P518.98 bilyon no ikumpara iti P18.546 trilyon idi katapusan ti Mayo, ken amang pay a nangatngato ngem ti P17.267 trilyon a nairekord idi Hunyo ti napalabas a tawen.
Basar iti BTr, ti 2.8 a porsiyento a nagngatoan ti utang ket kangrunaan a resulta ti nangatngato a panagutang ti gobierno agpada nga iti uneg ken ruwar ti pagilian tapno pondoan dagiti programa ti gobierno.
Umabot iti P12.837 trilyon ti domestic debt wenno utang iti uneg ti pagilian, nangatngato ti 2.74 porsiyento no ikumpara idi Mayo ken 7.43 porsiyento no ikumpara iti kapada a panawen iti napalabas a tawen no sadinno nga amin dagitoy ket manipod iti government securities.
