LAOAG CITY – Record high ti sovereign debt ti Pilipinas as of July 30, 2024 kabayatan nga agtultuloy ti panagutang ti gobierno ti Pilipinas tapno mapundoan ti budget daytoy para kadagiti programa ken proyekto.
Daytoy ket maibasar iti inruar a datos ti Bureau of the Treasury.
Basar iti ahensia, dumanonen iti P15.689 trillion a katukad ti 1.3% a panagngato manipud iti P15.483 trillion nga outstanding debt a nairekord iti katapusan ti Hunio iti kapada a tawen.
Inlawlawagna a ti P206.49 bilyon a month-on-month a panagngato ti utang ti pagilian ket gapu metten iti net issuance ti pang-uneg ken pang-ruar nga utang.
Basar iti ekonomista a ni Michael Ricafort, ti agtultuloy a panagngato ti inflation ket rason no apay a ngumatngato ti panaggastos ti gobierno.
Malaksid iti daytoy, nangato ti interes rate idinto nga apagapaman a kimmapsot ti sukat ti piso manipud idi 2022 a nangitunda ti panagngato ti gatad ti mabayadan iti utang.
Immunan nga inbatad ni Finance Secretary Ralph Recto a mabalin pay a ngumato ti utang ti Pilipinas iti P20 trillion iti panagleppas ti termino ni Presidente Ferdinand Marcos Jr. inton 2028.
Mamati ti sekretario a ti panagdur-as ti ekonomia ti pagilian ket ad-adu pay iti pakabuklan a gatad iti utang ti gobierno.
