LAOAG CITY – Pormalen a nangrugi ti vaccine rollout ditoy probinsya kalpasan a simmangpet dagiti 2,446 a doses ti Sinovac vaccine.
Naiyuswat ti rollout iti Mariano Marcos Memorial Hospital and Medical Center iti ciudad ti Batac, Governor Roque B. Ablan Sr. Memorial Hospital ken iti Laoag City General Hospital.
Ummuna a nabakunaan iti LCGH ni Dr. Crizelda Ciubal-Derpo, ti Medical specialist – infectious disease specialist ken simmaruno met dagiti doktor ken nurses.
Iti met MMMH&MC ket ummuna a nabakunaan ni Dr. Jose Orosa III, Chief of Medical Professional Staff, ken simmaruno met dagiti daduma pay nga health care workers.
Umabot iti 612 a doses ti bakuna ti naiyalokar iti GRASMH no sadinno nga ita nga aldaw ket target a mabakunaan dagiti 87 a medical healthcare workers ken agpaot daytoy iti tallo nga aldaw idinto nga iti ospital iti ciudad ti Batac ket 1500 doses ken iti LCGH ket 334 doses.
Naggeddan met a nabakunaan iti GRASMH da Dr. Norman Rabago, covid-19 consultant ken ni Dr. Walberg Samonte, ti director ti nadakamat nga ospital.
Inlawlawag na nga iti laksid a maysa isuna a senior citizen ket nakapasa iti screening ken awan met dagiti marikrina na a madi sakbay, kabayatan ken kalpasan a nabakunaan kontra iti covid-19.
Naragsak met dagiti nabakunaan ita nga aldaw gapo ta addan ti naan-anay a proteksyon na kontra iti covid-19 ket babaen ii daytoy ket magutigot pay dagiti medical health care workers nga agdudua pay laeng pakairamanan pay ti publiko.
