LAOAG CITY – Dinarusdos ti maysa a van dagiti barikada iti kalsada iti Gilbert Bridge iti Barangay 51-A ditoy siudad ti Laoag.
Ti driver ti van nga Hyundai Starex ket agtawen ti 42, awanan asawa ken residente ti Barangay 24 iti ili ti San Nicolas idinto ti kaduana ket adda iti umno a tawen, awanan asawa ken residente ti Barangay 8 iti ili ti Sarrat.
Basar iti Philippine National Police – Laoag Traffic Division, kabayatan a dumaldalyasat ti van nga agturong nga agpa-abagatan ket kellaat daytoy a napukawan ti kontrol ti manibela a nangitunda ti pannakaidungparda kadagiti barikada iti welcome arch ditoy siudad ti Laoag.
Gapu iti daytoy, nagsagaba ti sugat iti nagduduma a paset ti bagi ti pasahero a naitaray iti Governor Roque B. Ablan Sr. Memorial Hospital para iti pannakatamingna idinto a saan a naan-ano ti nangiturong ti van.
Naammoan a rumrummuar iti imbestigasion dagiti otoridad nga adda ti impluwensia ti nasanger ti driver ti van idi napasamak ti disgrasia.
Kabayatanna, insigida met a naiyurnos dagiti nadungpar a barikada tapno maliklikan ti panagirot ti taray ti trapiko.
