LAOAG CITY – Mamati ni Vice Governor Angelo Marcos Barba nga adda ti sabali a nakibiang ken nangswitik ti eleksyon isut gapuna a nangatiw ni Vice President Leni Robredo kontra ken ni dati a senador Bongbong Marcos.
Daytoy ti nagbalin a reaksyon ti bise gobernador seknan ti panangipetpetteng ni Robredo a saan a nagswitik iti napalabas nga eleksyon.
Inbatad ni Barba nga adda dagiti natibker nga ebidensya nga adda ti napasamak a panagswitik idi eleksyon gapu ti panagpukaw ti audit log a pakakitaan ti oras a simrek dagiti botos ken ti synchronized election return.
Innayon na a nakadildillaw pay ti pannakabasa dagiti balota tapno saanen a mabasa pay para ti recount ken ti panagsanud dagiti uppat a revisors.
