LAOAG CITY – Naitantan ti nasurok a maysa nga oras ti flight ti maysa a Southwest Airlines manipod Oakland, California nga agturong iti San Diego gapu iti naidumduma a pasahero, daytoy ket maysa a robot.
Kinumpirmaran ni Eily Ben-Abraham iti Elite Event Robotics a kadwa na ti 4-foot-tall, 70-pound robot, nga agnagan ti Bebop a naglugan iti eroplano iti Oakland San Francisco Bay Airport tapno agturong iti San Diego.
Inlawlawag ni Southwest Airlines spokesperson Lynn Lunsford a pudno a gimmatang ni Ben-Abraham ti para ken ni Bebop, ngem ti kangrunaan a nakaitantanan ti flight ket gapu iti presensya ti robot iti maysa a tugar iti aisle a mailabsing iti pagannurutan ti airline para iti panagbitbit ti dadakkel a gamit.
Gapu iti daytoy, naiyakar ni Bebop iti tugaw nga asideg ti tawa ngem adda manen ti simmaruno nga isyu nga inparuk-at ti airline staff.
Daytoy ket ti lithium battery a naduktalan ken ni Bebop no sadinno a dakkel unay daytoy ngem ti ipalpalubos ti Southwest Airlines, ken mapalubusan laeng a tumayab ti eroplano no maikkat ti nasao a baterya.
Saanen a nakiriri pay da Ben-Abraham ken ti robot tapno makapanaw dan iti nasao nga erupuerto.
