LAOAG CITY – Binabalaw ni Senador Erwin Tulfo ti maipagarup nga agtultuloy a panaglabsing dagiti sumagmamano a negosiante iti agdama a prize freeze ket nagpanawagan daytoy iti Department of Trade and Industry (DTI) a mangaramat ti inspeksion kadagiti merkado tapno masigurado ti proteksion dagiti aggatang.
Inpatungpal ti Department of Trade and Industry (DTI) ti prize freeze agigga Mayo 10 kas panagsungbat iti panagngato ti presio ti krudo ken epekto iti agtultuloy a rinnupak idiay Middle East.
Kinunana a dagiti mangnamnama kadagiti babassit a pagtagilakoan ti maapektaran gapu ta limitado laeng ti pagpilianda iti kangrunaan a kasapolan.
Innayonna a saanda nga agtalek laeng iti dokumento ket kasapolan a mangiyuswat iti on-ground inspection ti DTI.
Kabayatanna, ti siasinno man nga aglabsing iti prize freeze ket mabalin a mapilaan ti kasong adminitratibo, kas iti panagmulta, ken posible a pannakabalud depende iti dagsen ti naglabsingan.
