LAOAG CITY – Inpakaammo ni Vice Mayor Rey Carlos Fariñas a kiniddaw na iti Department of Education – Schools Division of Laoag babaen kenni Superintendent Joanne Corpuz iti live a pannaka-ere ti regular session ti Sangguniang Panlungsod iti radio station da a DWAT 93.9.
Daytoy ket kalpasan a naobserbaran na a saan pay a madanon ti internet connection dagiti sabali a lugar iti ciudad rason a saanda nga ammo ti sumagmamano a mapaspasamak iti bukod da a lugar.
Innayon na a nakadependar da paylaeng iti tradisional wenno iti radyo isut gapuna a sinaludsodna no possible a mai-ere ti session iti nadakamat a radio station.
Inbatadna nga immanamong ti Department of Education iti kiniddaw na ken masapol laengen ti pormal wenno pannakaipapel ti nasao nga addang kas maysa a kortesiya.
Nairekomendar met iti Committee on Education ti pannakaaramid ti maysa a resolusion para iti nasao nga addang.
