LAOAG CITY – Nakapungtot ni Vice Mayor Ferdinand Ignacio gapu kadagiti saan nga usto ken naadal a naimbag a dokumento ken rekord sakbay a naisumitir iti konseho iti ili ti Paoay.
Inawagan pay ti bise mayor a basura dagiti dokumento wenno rekord a maisub-submitir iti konseho.
Inaramid daytoy ti bise mayor bayat ti sesyon no sadinno a pinagpalawag na ni Municipal Treasurer Adela Rebolledo gapu ta agpapan ita ket saan metlaeng a maplastar ti annual budget iti nasao nga ili.
Inadmitir ni Rebolledo a no ania ti kamali da iti napalabas a tawen ket isu metlaeng ti nagkamalian da ita a tawen.
Nupay kasta, inpasigurado na nga urnusen ken adalen da a naimbag sakbay nga isumitir da manen dagiti kasapulan a dokumento wenno papeles.
Gapu iti daytoy a sungbat ni Rebolledo ket ad-adda manen a nakapungtot ti bise mayor gapu ta inpetteng na a dagitoy ket nabayag dan nga agpapaay iti munisipyo ken ninamnama da nga ammo dan ti ar-aramiden da.
Kabayatanna, dinillaw pay ni Ignacio no apay nga adda dagiti na-purchase iti municipyo a saan a naikabil ti pakabuklan ti naiyalokar a pondo no di ket ti laeng nailanaden ket ti nabati a pondo.
Insungbat met ni Rebolledo a ti nasao a report ket aggapo iti Budget Office ngem nailawlawag nan kadagiti maseknan ti rumbeng nga aramiden da.
Mainaig iti daytoy, inlawlawag met ni Municipal Accountant Cristie Aquino a laeng trabaho da ket ti mangcheck kadagiti nabayadan no sadinno a ti rumbeng nga agisagana ti pakabuklan ti report ket ti Budget Office.
Malaksid iti daytoy, naduktalan pay a ti Annual Investment Plan (AIP) ket maipagarop a saan a dumaldalan iti Local Finance Committee (LFC).
