LAOAG CITY – Nabirokan ti maysa pay a bangkay iti narpuog a pasdek idiay Angeles City, Pampanga idi rabii ti Mierkoles.
Iti oras iti 6:18 ti rabii, nabirokan ti maysa a bangkay iti sector 1 ti pasdek babaen iti tulong ti canine unit ti Philippine Coast Guard.
Gapu iti daytoy, umaboten iti lima ti bilang dagiti pimmusay pakairaman ti Malaysian national.
Segun ken ni Interior and Local Government Secretary Jonvic Remulla, saanda pay nga iwalwalin ti posibilidad nga adda pay dagiti nakalasat iti uneg iti narpuog a pasdek kalpasan iti report ti operasion ti search and rescue ken retrieval operation a mapatta-patta nga awanen ti senyales dagiti sibibiag.
Kabayatanna, dinakamat ni Remulla a posible pay nga adda pay nakalasat a mabirokanda.
Mainaig iti daytoy, saan pay a nagpakita ti akinkukua ti construction firm iti maar-aramid a pasdek.
Dinakamat ni Remulla a mangiparuk-atda ti subpoena ken hold departure order iti eropuerto kontra iti nasao nga indibidual.
Inpetteng met ni Acting Labor Secretary Francis Tolentino a mabalin a mapilaan ti kaso kriminal iti akinkukua iti nasao a kompania iti panaglabsing ti Labor Code.
Innayonna pay dagiti isiyu ti safety protocols iti nasao a construction site.
