LAOAG CITY – Kinontra ti common legal representative ti drug war victims a ni Atty. Gilbert Andres ti argumento ti depensa a saan a kinunsinti ti Duterte administration ti rotten police officers.
Iti closing statement ti Victims’ Counsel, inkalintegan ni Atty. Andres a saan a napilaan ti kaso kriminal dagiti police officers a responsable iti pannakatay ti 3,967 a drug personalities a napapatay iti drug operations manipod Hulyo 1, 2016 agingga iti Nobiyembre 27, 2017.
Kuna na a kas pammaneknek ket umabot laeng ti 302 a kaso ti naimbestigar manipod iti nasao a datos.
Nagtalinaed ti takder ni Atty. Andres nga adda ti umdas nga ebidensya tapno kumpirmaren ti mode of liability iti babaen ti Article 25 3a kas ti apela ti prosekusyon.
Inpetteng pay ni Atty. Andres nga adda ti naipresentar nga umdas nga ebidensiya ti prosekusyon tapno makaidasar ti substantial grounds ken pammaneknek a naaramid ti dati a presidente ti kada krimen a maiyak-akusar kenkuana ken masapol a makumpirmaran ken mausig.
Kabayatanna, inpetteng ti Drug war victims lawyer a karaman kadagiti maipagarop a sistematiko a napatay iti babaen ti kampanya kontra illegal a droga ni dati a Presidente Rodrigo Duterte ket dagiti ubbing ken saan a maibilang a “collateral damage” ti pannakatay da.
Kuna na a saan a naikonsiderar ti Philippine National Police (PNP) Operational Procedural Manual a naiparuk-at idi 2021 iti panangsoblar ti kaso kontra ken ni Duterte.
