LAOAG CITY – Saan a pabor ni Laoag City Vice Mayor Rey Carlos Fariñas iti online participation iti panagatendar iti regular session.
Segun kenkuana, daytoy ket kalpasan nga idatagda koma iti konseho a no mabalin nga agatendar iti online dagiti saan a makaatendar a personal iti session.
Nupay kasta, inlawlawagna a basar iti panangtingitingda iti daytoy ket saan a maiyannatop a maipatungpal ti nasao nga addang aglalo ket awan met ti didigra wenno pandemia a makaapektar iti panagatendarda iti session.
Inbatadna a no maipalubos daytoy ket mabalin a maabuso uray awan met ti sakit ti maysa nga agpanpanday linteg ket agatendar babaen iti online.
Kabayatanna, inpetteng ni Vice Mayor Fariñas a saan a nasken a tuladen dagiti mapaspasamak nga isyu kadagiti adda iti national level gapu ta makaitunda laeng ti riribok iti panagserbi kadagiti umili ditoy probinsia.
