LAOAG CITY – Inawagan ni Manila Rep. Bienvenido “Benny” Abante Jr. nga awan ti panangrespetar ti proseso ti Konstitusion ti agtultuloy a saan a panagetandar ni Vice President Sara Duterte iti impeachment trial daytoy iti Senado nga umaboten iti 15 nga aldaw.
Inbatad ni Abante a ti saan a panagsango ni Duterte ket kapada ti nagbalin a tignayna iti Kamara de Representantes sakbay a na-impeach isuna idi nagkedked daytoy a personal a sumango kadagiti imbestigasion mainaig iti confidential funds.
Maysa ni Abante kadagiti nangiyendorso ti impeachment complaint a nagbalin a nagibasaran ti Articles of Impeachment nga inpatulod ti Kamara de Representantes iti Senado.
Paset ti reklamo dagiti imbestigasion iti confidential funds ti Office of the Vice President ken Department of Education nga agpada nga indauloan ni Duterte manipud 2022 agingga 2024.
Saan met a nagatendar ni Duterte kadagiti panagdengngeg ti House committees ken sipud nangrugi ti impeachment trial idi Hulio 6, dagiti laeng abogadona ti regular a sumangsango iti Senado.
Inlawlawag ni Abante a saan a kayatna a saoen ket guilty ni Duterte gapu iti panangitantanna ngem inpettengna a nasken a personal a sangoen ti Bise Presidente dagiti alegasion.
Maipalagip nga idi Biernes ket kwinestionaran ti House prosecution panel ti inawagan a “selective attendance” ni Duterte.
