LAOAG CITY – Inpetteng ti Commission on Audit (COA) a ni Vice President Sara Duterte ti kakaisuna laeng a Bise Presidente a dimmalan iti auditing ti ahensia.
Iti maika-11 nga aldaw ti impeachment trial ni Vice President Sara, dinakamat ni dati nga state auditor ti Commission on Audit – Intelligence and Confidential Funds Audit Office (COA-ICFAO) Roderick Wamil a sipud idi nadutokan isuna iti opisina idi 2014, ni laeng Vice President Sara ti naipadalan iti audit ti confidential funds.
Inlawlawag ni Wamil, ni Vice President Sara laeng ti Bise Presidente ken isuna laeng pay ti kakaisuna a dati nga Education Secretary ti naaddaan ti confidential funds.
Kunana a saan a naaddaan ti confidential ken intelligence funds dagiti dati a Vice Presidents nga isuda dati a Vice President Jejomar Binay ken dati a Vice President Leni Robredo.
Iti panagtestigo ni Wamil, inpettengna a saan a mabalin nga usaren ti Confidential and Intelligence Funds kas panagbayad ti sueldo, overtime, nayon a compensation, allowance wenno dadduma pay a benepisio dagiti opisial wenno empleado ti maysa nga ahensia.
Saan daytoy a nasken nga usaren iti representation, consultancy fees wenno entertainment expenses ken uray iti panangipasdek wenno acquisition ti pasdek wenno housing structures.
Kabayatanna, kuna met ni Atty. Michael Poa ti defense team a nakasaganada nga i-stipulate dagiti exhibits malaksid iti acknowledgement receipts nga addaan ti petsa a Disiembre 21 agingga Disiembre 31, 2022.
Maipalagip a nagbalin a kontrobersial ti petsa daytoy gapu ta nadakamat nga iti uneg ti 11 nga aldaw ket ginastos ti Office of the Vice President ti adda iti pakabuklan a P500 million a confidential funds idinto nga iti umuna, maikadua ken maikatlo a quarter ti 2023 ket umabot iti P112.5 million ti maibagbaga a ginastos a confidential funds ti Bise Presidente idi ti Department of Education.
