LAOAG CITY – Personal a nagturong iti Office of the Taguig City Prosecutor ni Vice President Sara Duterte tapno mangipila ken sapataan ti reklamo a perjury kontra ken ni Ramil Madriaga.
Ni Madriaga ket self confessed former aide ken inadmitirna a bagman ni Vice President Duterte.
Inbatad ni Atty. Paolo Panelo, legal counsel ti Bise Presidente, namunganay ti naipila a reklamo iti saan nga husto nga statement ni Madriaga manipud iti affidavit-na idi Nobiembre 29, 2025.
Kuna ni Madriaga a nagserbi daytoy nga intelligence and security officer a timmulong iti “Inday Sara Duterte is my President” (ISIP) group idi 2020 a rumrummuar a nag-deliver ti kuarta kadagiti personalidad iti maipagarup a pammilin ni dati a Presidente Rodrigo Duterte ken Vice President Sara.
Nupay kasta, inpetteng ni Vice President Sara a nakaalada ti certification manipud iti Presidential Security Command, Armed Forces of the Philippines Security and Protection Group (AFP-SPG), Department of Education (DepEd), Davao City local government unit (LGU) a mangipaneknek a saanda a nagbalin nga empleado ni Madriaga.
Inlawlawag met ni Atty. Panelo Jr. mainaig iti “timing” ti panangipila ti reklamo ken ni Madriaga gapu ta idi pay laeng napalabas a tawen ti affidavit daytoy ngem ita laeng nagaramid ti tignay ti Bise Presidente gapu ta nairaman ni Madriaga kadagiti testigo iti impeachment complaint kontra kenkuana.
