LAOAG CITY – Kwinestionaran ni Vice President Sara Duterte ti pananggandat a panangarestar ken ni Senador Ronald ”Bato” dela Rosa ti warrant of arrest ti International Criminal Court (ICC).
Inbatad ni Vice President Sara a nasken nga ipasango nga umuna iti korte iti Pilipinas ti aniaman a warrant of arrest nga aggapu iti sabali a pagilian sakbay daytoy nga iserbi.
Kunana a ti warrant of arrest a saan nga inparuk-at ti korte iti Pilipinas ket masapul a dumalan pay laeng iti local judicial process.
Maipalagip nga inarestar met idi Marso 2025 ni dati a Presidente Rodrigo Duterte maiyallubog iti warrant manipud iti International Criminal Court mainaig iti war on drugs campaign ti administrasionna.
Kabayatanna, nagpakita manen ni dela Rosa iti Senado idi kalman kalpasan ti innem a bulan a saan a panagatendar iti sesyon.
Iti panagsublina, ginandat dagiti operatiba ti National Bureau of Investigation (NBI) nga iserbi kenkuana ti arrest warrant manipud iti International Criminal Court.
Ti warrant kontra ken ni dela Rosa ket immuna a naiparuk-at kas “secret” idi Nobiembre 6, 2025 ken adda ti pakainaiganna kadagiti panangpapatay iti kangitingitan ti ‘war on drugs campaign’ ti dati nga administrasion.
