LAOAG CITY – Natiliw ti maysa a lalaki babaen ti naiyuswat a drug buybust operation iti Brgy. 1 ditoy siudad ti Laoag.
Nabigbig ti suspek a ni Faisal Limbona y Madamba, agtawen ti 37, baro, waiter, ken agnanaed iti Carning’s Disco iti nasao a barangay.
Agdagup ti lima a sachet a naglaon ti maipagarup a napagango a bulong, bukel ken tangkay ti marijuana ken maysa a 500 peso bill ti nakumpiskar dagiti otoridad manipud kenni Limbona.
Immuna iti datoy, naglako ni Limbona ti dua a sachet a naglaon ti maipagarup a napagango a bulong ti marijuana iti nagpammarang a gumatang a kameng ti PNP.
Tallo a sachet ti narekobre manipud iti ikot ni Limbona agraman ti busybust money.
Segun kenni Limbona, nagturong iti maysa a tiangi tapno mapan gumatang iti sigarilyona ket dita a kellaat a tiniliw dagiti otoridad.
Inpetteng na saanna a kukua dagiti ebidensya gapu ta nabayagen a nagbalbaliw.
Inlawlawagna a dati a naibalod idi tawen 2019 ngem nakaruar met laeng idi tawen 2020 kalpasan a na-acquit.
Naammoan nga agdagsen ti 15.1 grams ti nakumpiskar a maipagarup a marijuana nga agbalor ti 1,812 pesos.
Basar ti Philippine National Police ditoy siudad, maibilang nga Street Level Individual ti suspek, sumagmamanon a bulan a namonitorda.
Nagtalinaed ti suspek iti kustudyar ti PNP bayat a maisagsagana ti maipila a reklamo kontra ti suspek a panaglabsing iti RA 9165 wenno Comprehensive Dangerous Drugs Act of 2002.
