LAOAG CITY – Inbatad ni Mrs. Lita Malabed Cacatian iti Hawaii a kalikagom da a mapatawan ti pannusa dagiti walo nga agtutubo a napan nangserrek iti balay da iti Sitio 6, Barangay Sta. Rita iti ili ti Paoay.
Immunan a naireport a sinerrek dagiti suspek ti pagtaengan da Cacatian babaen ti panangdadael da ti padlocks dagiti ridaw ti balay ken ininum da amin a collection da a wines, inusar da ti aircon, kama ken naglutluto pay dagitoy.
Malaksid iti daytoy, maipagarop nga adda pay dagiti tela nga innala dagiti suspek ken pinanawan da a nakarugrugit iti uneg ti balay.
Inpetteng ni Cacatian nga idi damo ket inpalgak da a masapol a bayadan amin dagiti suspek ti perdisyon iti balay da ngem nagsangsangit dagiti nagannak dagiti agtutubo.
Innayon na a makita na a saan a kabaelan dagiti nagannak dagiti agtutubo ti agbayad ken mangpatarimaan kadagiti nadadael isut gapuna a nagdesisyon da nga agasawa nga isuda lattan ti makaammo a mangpatarimaan iti balay da.
Nupay kasta, kuna ni Cacatian ket kayat da a madusa dagiti suspek tapno adda ti pagnakman da ken mangnamnama a saan danton nga aramiden ti panagserrek iti balay.
Mainaig iti daytoy, kuna ni Mrs. Emely Manuel, caretaker iti balay da Cacatian a ti nagibutaktak kadagiti dadduma pay a suspek ket ti maysa nga ubing nga immuna a natiliw da kalpasan a nakita nga adda iti ruwar ti sinerrek da a balay.
Inpakaammo na a kadagupan kadagiti walo nga agtutubo a nangserrek iti banbantayan na a balay ket maysa laeng ti am-ammo na.
Naamoan a mapagsasaritaan ti napasamak iti Department of Social Welfare Development (DSWD) gapu ta menor de edad dagiti suspek.
