LAOAG CITY – Nangiruar ti resolution ti Commission on Elections (COMELEC) a palubosan dagiti otoridad nga arestaren dagiti vote buyers ken sellers uray awan ti warrant of arrest.
Basar iti Commission on Elections, gagem ti Resolution 11104 ket tapno maipalawa ti kabaelan ti Committee on Kontra-Bigay ti Commission on Elections nga isu ti mangmonmonitor kadagiti vote buying ken selling ita nga eleksion.
Nailanad ditoy a mabalin a tiliwen dagiti otoridad ti asinoman a maaktuaranda a naglabsing iti naipatungpal a pagannurotan nga inyetnag ti Commission on Elections.
Naammoan a dagiti maarestar ket maikabil iti kaasitgan a police station idinto a dagiti banag wenno ebidensia a maala ket maipaima iti Commission on Elections.
