LAOAG CITY – Pinalagipan ti state weather bureau dagiti residente iti coastal areas ken flood-prone areas a mangiwayat ti preemptive evacuation sakbay pay iti iduduprak ti Bagyo Uwan.
Iti press briefing ti Department of Science and Technology (DOST-PAGASA), inallukoy ni Administrator Nathaniel Servando dagiti umili ken dagiti lokal a gobierno a saanen nga iyuray pay a marikna ti inisyal a panagduprak ti bagyo sakbay pay nga agibakwit.
Inbatadna a maysa a narisgo a sasaaden ti panawen ti Bagyo Uwan gapu iti napigsa nga angin daytoy idinto a ti sirkulasion ket dumanon pay iti sumurok 700 a kilometro.
Addaan ti nasao a bagyo ti torrential rains, ‘destructive wind’ ken storm surge.
Inlawlawagna nga amin dagitoy ket manamnama a mangitunda ti nakaro a panaglayus, panagreggaay ti daga ken dadakkel a dalluyong a posible a dumanon pay kadagiti pagtaengan.
Kuna ni Servando, dakkel ti pangta ti bagyo iti biag ken kadagiti sanikua isut gapuna a masapul nga agibakwit sakbay pay a marikna iti iduduprak ti bagyo.
Inpetteng ti state weather bureau chief a ti nasapa a panagibakwit ket tulbek tapno malappedan ken maliklikan a maaddaan ti casualties nangruna kadagiti lugar a manamnama a pagdalyasatan ti napigsa a bagyo.
Inpasiguradona ti pannakaiparuk-at ti tugma ken husto nga impormasion mainaig iti bagyo kas panangbayabay kadagiti umili.
