LAOAG CITY – Inreport ti World Health Organization (WHO) a nairekord ti pito a kaso ti hantavirus manipud Abril 1 agingga iti Mayo 4 kabayatan nga adda iti biyahe ti cruise ship nga MV Hondius.
Dua ti kumpirmado ken lima ti mapagat-atapan a kaso, karaman ditoy ti tallo a pimmusay.
Iti maysa nga statement, inrakurak ni Director-General Tedros Adhanom Ghebreyesus nga ibilang ti World Helth Organization a nababa ti risgo ti virus iti populasyon ti lubong, ngem agtultuloy ti panagmonitor da iti sitwasyon ken mangiparuk-at kadagiti update no kasapulan.
Kuna na a manarimaan metten ti pannakikoordinar ti World Health Organization kadagiti apektado a pagilian ken iti operator ti barko tapno matulungan dagiti pasahero ken tripulante.
Karaman kadagiti ar-aramiden nga addang ket ti naiget nga imbestigasyon, panag-isolate ken panangagas kadagiti kaso, medical evacuation, ken laboratory testing tapno maestablisar ti makaigapu ken panagwaras ti sakit.
Ti hantavirus ket maysa a virus a maala manipod kadagiti bao ken mabalin a maipasa iti tao iti babaen ti isbo, rugit wenno katay dagitoy.
Mabalin pay a mangitunda ti nakaro a sakit kas ti hantavirus pulmonary syndrome wenno hemorrhagic fever nga addaan ti kidney complications.
