LAOAG CITY – Maladingitan ti World Health Organization (WHO) iti nagbalin a desisyon ni US President Donald Trump a pumanawen ti Estados Unidos manipod iti nasao nga organisasyon.
Ti World Health Organization ket addaan ti napateg a papel iti panangprotehir iti salun-at ken seguridad dagiti tattao iti intero a lubong, karaman dagiti US nationals, iti babaen ti panangsango kadagiti ramot ti sakit, pannakapapigsa dagiti sistema iti salun-at, ken panangduktal, panangliklik ken panangsolbar kadagiti health emergencies, karaman ti panagraira dagiti sakit iti high risk areas no sadinno a saan a madanun ti dadduma.
Karaman met ti Estados Unidos iti founding members ti World Health Organization idi 1948 ken paset iti panangmuli ken pannakaiwanwan iti trabaho ti World Health Organization, karaman ditoy ti aktibo a pannakipaset iti World Health Assembly ken Executive Board.
Iti uneg ti nasurok a pito a dekada, ti World Health Organization ken ti Estados Unidos ket nakaisalakan ti saanen a mabilang a biag ken naruayen dagiti naprotehiran a tattao manipod kadagiti pangta iti slaun-at.
Kabayatanna, mangnamnama ti World Health Organization a balbaliw nga ikonsiderar ti Estados Unidos ti nagbalin a desisyon ni President Trump tapno agtultuloy latta ti panagtinnulong ti organisasyon ken ti Amerika para iti pannakaprotehir ti salun-at dagiti minilyon a tattao iti intero a lubong.
