LAOAG CITY – Gagem ti Young Communicators’ Circle wenno Y2C ti College of Arts and Sciences iti Mariano Marcos State University iti siudad ti Batac a mapagbalin a nationwide ti Aweng Awards.
Segun ken ni Prof. Brett Bungcayao, Co-Adviser ti Young Communicators’ Circle, in-inutenda daytoy agingga a magun-od ti arapaapda a mapadakkel ken mapalawa ti nasao a pammigbig para kadagiti agirakrakurak iti uneg ken ruar iti probinsia ti Ilocos Norte.
Inbatadna nga adda dagiti sumagmamano a criteria ti nasurot iti panagpili ti Best Local AM Radio Personality no sadino naarisit a naimbag dagiti nagbalin a nominado iti creativity, clarity ti panagirakurak ken dagiti mensahe pakairamanan iti panangbigbig iti radyo kas medium iti panagipadamag.
Inlawlawagna a manipod iti agarup 200 nga estudiante ti Communication program ket ni Bombo Jay Agnir ti nakagun-od ti kangatoan a puntos kas Best Local AM Radio Personality iti kaliplippas a 2nd Aweng Awards.
Kabayatanna, naammoan a ti Aweng Awards ket kakaisuna nga university-based award-giving body iti Ilocos Region a mangted pammadayaw kadagiti media personalities, radio stations ken news pages.
Maipalagip nga immunan a nagun-od ni Bombo Romnick Quimoyog ti Best Local AM Radio Personality kagiddan ti Y2C’s first-ever Best Local AM Radio Station ti Bombo Radyo Laoag iti napalabas a tawen 2023.
