LAOAG CITY – Nakagun-od ti world record ti maysa nga Youtuber idiay Canada kalpasan a naibosna ti dua a bote ti Sriracha hot sauce iti uneg ti sumagmamano a minuto.
Kinumpirmaran ti records keeping organization a Guinness World Records a ni Mike Jack ti baro a record holder ti titulo a “Most Hot Sauce Eaten in Three Minutes” kalpasan a naibosna ti 1.12 kilograms ti Sriracha hot sauce iti uneg ti tallo a minuto.
Naammoan a ni Jack ket maysa nga speed eater ken kalikagumna a maburak ti amin a world record nga adda ti pakainaiganna iti kinapaspas a mangan.
Naiyuswat ti record breaking attempt ni Jack iti Headquarters ti Guinness World Records idiay London.
Inaramidna daytoy kalpasan a nagun-odna ti world record title iti kinnapaspasan ti uminom ti juice babaen iti paper straw.
Inbatad ni Jack, adu ti makaam-ammo kenkuana ti nagdanag no kasano daytoy a maka-survive iti kasilyas kalpasan ti record attempt-na.
Nupay kasta, binagaanna dagitoy nga adda ti super power-na a saan nga agsakit ti buksitna nupay nangan isuna ti naaadat a taraon.
