LAOAG CITY – Panawenen tapno mapatuludan ti contempt order wenno ipaarestar dagiti sumagmamano a personalidad nga agtultuloy a saan nga agat-atendar iti panagdengngeg ti Senate Blue Ribbon Committee.
Daytoy ket kagiddan ti sumagmamano a daras a panangimbitar kadakuada ngem nagtalinaed latta a saanda nga agat-atendar gapu kadagiti nagduduma a rason pakairamanan ti posible a panaglemlemmeng mainaig iti kaso.
Karaman ditoy ti dati nga House Appropriations Committee chair a ni Zaldy Co ken dadduma pay nga high-profile personalities a karaman iti flood control scandal.
Inbatad ni Senate Blue Ribbon Committee Chairman Ping Lacson, kasapulan pay laeng a maaddaan ti pormal a panagdengngeg ti komite sakbay a maipatungpal ti contempt order kontra kadakuada.
Inlawlawagna a nasken nga agbalin a patas ti pannakaipakat ti contempt order kadagiti amin a maim-imbestigaran a resource persons.
Kunana a saan a nainkalintegan a dagiti immuna a nagatendar kas ti contractor a ni Curlee Discaya ket insigida a napatawan ti contempt idinto a baybay-an laeng dagiti dadduma a saan nga ikankano ti panangimbitar ti Senado.
Iti agdama, awan pay ti naikeddeng a petsa no inton ano manen a mangisayangkat ti panagdengngeg ti nasao a komite.
