LAOAG CITY – Maysa ti natay idinto a maysa ti nasugatan iti napasamak a desgrasya iti Piddig-Laoag road bisinidad iti Brgy. 6, Tonoton, Piddig, Ilocos Norte.
Nabigbig ti natay a ni Joey Rasay y Malunao, agtawen iti 21, baro, nangiturong ti motorsiklo idinto a nasugatan ti inlubbon na a maysa a menor edad, agpada dagitoy a residente iti Brgy 22, Sarrat, Ilocos Norte.
Naamoan a bayat ti panagdaldalyasat dagiti biktima iti National Highway ket nakasinnapgud na ti maysa pay a motorsiklo nga inturong ni Vernon Gorospe y Alonday, agtawen iti 22, residente iti Brgy. 13, Libnaoan iti ili a Piddig.
Gapu ti daytoy, natennag ni Rasay idinto a naipurwak ti menor de edad nga inlubbon na.
Naitaray ni Rasay iti Gov. Roque B. Ablan Memorial Hospital and Medical Center ditoy ciudad ti Laoag ngem naideklara a dead on arrival idinto a ti inlubbon na a menor de edad ket nagsagaba ti sugsugat iti nagduduma a paset ti bagina.
