LAOAG CITY – Napalubusan latta dagiti turista a makastrek iti Tinglayan, Kalinga, partikular iti Barangay Buscalan no sadinno a makita ti nalatak a mambabatok a ni Apo Whang-Od, bayat iti agtultuloy a tribal conflict iti nagbaetan dagiti tribu a Butbot ken Tulgo.
Segun ken ni PMAJ John Vladimir Bawer, hepe ti PNP-Tinglayan, masapol pay laeng nga agpirma ti waiver dagiti bisita bayat nga aagtaltalinaedda iti temporary lockdown ken ti panangipatungpal ti travel restriction dagiti pito a barangay iti nasao a lugar.
Ti nasao a tribal conflict ket gapu iti kimmaro a boundary dispute kalpasan ti panangpapatayda iti maysa nga agtawen 70 a mannalon idi napalabas a tawen.
Saan a nasurot ti imunan a 90-day ceasefire agreement idi Hulio ita a tawen gapu iti panaglabsing dagiti agsinnumbagir a tribu.
Gapu iti daytoy, naka-deploy dagiti peacekeeping force bayat ti pannakaiyakar iti alternative learning modalities ti panagbasa dagiti estudiante iti lugar.
