LAOAG CITY – Kinumpirmaran ni Barangay Kagawad Jay-Z Lagundino iti Barangay Pancian iti ili ti Pagudpud nga agarop 10 a pamilya ti nagtalinaed iti evacuation center gapo iti pannakaapektar ti pagtaengan da iti panagngato ti lebel ti danom iti karayan.
Segun kenni Lagundino, intunda daytoy ti agtultuloy a panagtudo na iti nasao nga ili.
Inbatad na a narigat ita ti sitwasyon da nangruna ket awan ti makastrek a rescue wenno saan a makadalyasat dagiti opisyal ti ili da a mapan iti barangay da gapo iti landislide iti Sitio Banquero.
Inlawlawag na a no adda ti maipaay a tulong manipud iti munisipyo ket maamoan da babaen laeng iti tawag ken isuda pay laeng ti mangabunar gapo ta saan a makalasat dagiti maseknan.
Kunana nga adda met pay laeng ti nabatbati nga stocks dagiti pagtagilakoan iti barangay da nga isu ti gatangen dagiti kalugaran na.
Mainaig iti daytoy, inpakammo ni Lagundino nga iti Sitio Banquero ket saan pay a madalanan gapo iti panagregaay ti daga ken amangan no nasurok pay a makalawas sakbay a malpas ti clearing operation.
Kabayatanna, agkidkiddaw ti tulong ni Lagundino para kadagiti kabarangayan na gapo iti agdama a sitwasyon da.
