LAOAG CITY – Natay ti saan a bumaba iti 10 nga indibidual ken idinto a dandani 100 met ti nagsagaba ti sugat kalpasan a timmama ti ballistic missile ti Russia iti maysa a lugar nga asideg iti Kyiv, Ukraine a pakaisaysayangkatan ti maysa a defense industry event.
Segun ken ni acting regional military administration head Ruslan Oliinyk, timmama ti missile iti maysa a pribado a military training site iti Bucha district, sumurok-kumurang 20 agingga 30 a kilomentro manipud iti sentro ti Kyiv.
Malaksid kadagiti natay ken nasugatan, nadadael pay ti 27 a babbalay ken 44 a lugan iti lugar.
Gapu iti daytoy, imbilin ni Ukrainian Prosecutor General Ruslan Kravchenko ti pannakaiwayat ti war crimes investigation mainaig iti nasao a panagatake.
Napasamak ti panagatake kalpasan a nakitaripnong ni Ukrainian President Volodymyr Zelenskyy kadagiti opisial ti Raytheon, maysa a kumpanya nga agararamid ti Patriot air defense system nga araramaten ti Ukraine kontra kadagiti ballistic missile ti Russia.
