LAOAG CITY – Timmama ti Russian drone iti Northern Bridge, maysa kadagiti kadakkelan a rangtay idiay Kyiv, Ukraine, kabayatan ti panagbisita ni German Chancellor Friedrich Merz iti nasao a lugar para iti panangipakitana ti suportana ken ni Ukrainian President Volodymyr Zelensky.
Segun ken iti Kyiv Mayor a ni Vitaly Klitschko, dua nga indibidual ti nasugatan iti nasao a panagatake, no sadinno a basar kadagiti video, makita a bimtak ti maysa a paset ti rangtay a nangitunda ti uram ken ti nabengbeng a nangisit nga asuk kabayatan ti panagdalyasat dagiti sumagmamano a lugan.
Mainaig iti daytoy, daytoyen ti maika-dua a daras a natamaan ti Northern Bridge iti uneg laeng ti dua nga aldaw, kabayatan ti pannakaipaiget ti Russia kadagiti panagatakena kontra iti kabisera ti Ukraine.
Napasamak ti insidente kabayatan ti panagbisita ni Merz idiay Kyiv kaduana ni German Minister for Economic Affairs and Energy Katrina Reiche.
Kabayatanna, immunan a nagballaag ti Russia a narisgo ti pagilian a Ukraine para kadagiti bisita ken opisial gapu iti agtultuloy a panagatakeda iti nasao a pagilian.
Iti nasao a panagbisita, naikeddeng ti panangileppas da Zelensky ken Merz iti maysa a defense ken industrial partnership iti nagbaetan ti Ukraine ken Germany, pakairamanan ti katulaganda para iti produksion kadagiti drone ken missiles.
Malaksid kadaytoy, manamnama pay ti panangipaay ti Germany ti €1 billion (euro) wenno sumurok-kumurang $1.13 billion para iti military aid ti Ukraine ken ti kanayunan pay a €35 million (euro) wenno $390 million para met iti konstruksion dagiti nadadael nga energy infrastructure ti pagilian.
