LAOAG CITY – Mamulaan ti 10 nga ektaria a daga ti ‘beema bamboo’ iti Barangay Camandingan iti siudad ti Batac.
Daytoy ket kas paset pay laeng ti programa a Sustainable Agroforestry Farm Enterprise-Bamboo Business Model wenno SAFE BBM.
Segun ken ni Usec. Cheryl Marie Natividad Caballero, Department of Agriculture Undersecretary for High Value Crops, daytoy ket maysa a wagas tapno ma-develop ti integrated area iti nasao a lugar.
Inbatadna nga iti baet nga adu ti programa a naisayangkat iti nasao a siudad ket daytoy ti maipangpangruna.
Inlawlawagna a ti kawayan ket maibilang nga insurance crop gapu ta mabalin nga agbiag agingga iti 50 a tawen wenno at-atiddog pay.
Kunana a saan a dagiti gagangay a cuttings ti maimula ngem manipud iti tissue culture rason a mabalin a maammoan ti kaatiddog ti panagbiagna.
Innayonna a mangnamnama daytoy a mapadur-as ti nasao a proyekto gapu ta napintas dagiti naimula.
