LAOAG CITY – Nakaukkon ti sangagasut ket dua a bags ti dara ti Ilocos Norte Youth Development Office wenno INYDO iti inyuswat da a Sirib Youth Blood Bank.
Inbatad ni Mr. Patrick Ratuita, maysa kadagiti agserserbi iti nadakamat a pangopisinaan ken in-charge iti aktibidad, naiyuswat ti nasao a bloodletting wenno panagidonar ti dara iti Northwestern University.
Inlawlawag na a nakibinnulig da iti Bes Life, Northwestern University, Philippine Navy, ken Philippine Red Cross.
Mainaig iti daytoy, inpadanon ni Gov. Matthew Marcos Manotoc ti napalaus a panagyamanna kadagiti organisasyon ken ahensia nga agtultuloy a mangisaysayangkat iti maiyasping nga aktibidad.
Mamati ti gobernador a dakkel ti maitulong daytoy iti pannakaiyatiddog ti biag dagiti kakailian nga agkasapulan ti dara.
Kageddan daytoy, ginutigotna dagiti kakailian nga agidonar ti dara a saan laeng a makatulong kadagiti agkasapulan ti dara ngem dakkel pay a makatulong iti pannakatagiben ti salun-at dagitoy.
